ਤਵੀਤੀ


ਮੇਰੀ ਘਰਵਾਲੀ ਦੇ ਭੂਆ ਦਾ ਮੁੰਡਾ ਪਰਿਵਾਰ ਸਮੇਤ ਸਾਡੇ ਪਿੰਡ ਨਾਨਕੀ ਸ਼ੱਕ ਆਏ ਹੋਏ ਸਨ ! ਪਰਸੋੰ ਹੀ ਉਸਦਾ ਫੋਨ ਆ ਗਿਆ ਸੀ ਕਿ ਅਸੀਂ ਘਰ ਹੋ ਕੇ ਜਾਵਾਂਗੇ ! ਫਿਰ ਸ਼ਾਮ ਨੂੰ ਫੋਨ ਕੀਤਾ ਕਿ ਜਾਗੋ ਲੈ ਕੇ ਆਵਾਂਗੇ ! ਆਖਰ ਰਾਤ ਨੂੰ ਵਾਹਵਾ ਹਨੇਰੇ ਹੋਏ ਆ ਬੂਹਾ ਖੜਕਾਇਆ ਮੇਲਣਾਂ ਨੇ ! ਵਾਹਵਾ ਖੜਕਾ ਦੜਕਾ ਤੇ ਰੌਲਾ ਗੌਲਾ ! ਮੇਲਣਾਂ ਦੀ ਚਮਕ ਦਮਕ ਨੇ ਵੇਹੜੇ ਦਾ ਲਾਟੂ ਵੀ ਮੱਧਮ ਪਾ ਦਿੱਤਾ ! ਉਨਾਂ ਵਿੱਚ ਹੀ ਇੱਕ ਸੁਬਕ ਜਿਹੀ ਕੁੜੀ ਵੀ ਸੀ ! ਜਿਵੇਂ ਸਾਦਗੀ ਹੀ ਉਸਦਾ ਅਸਲ ਸੁਹਪਣ ਸੀ ! ਮੇਰੀ ਘਰਵਾਲੀ ਨੇ ਦੱਸਿਆ ਕਿ ਇਸੇ ਕੁੜੀ ਦਾ ਰਿਸ਼ਤਾ ਹੀ ਆਪਣੇ ਜਿੰਦਰ(ਮੇਰੇ ਚਾਚੇ ਦਾ ਮੁੰਡਾ ) ਨੂੰ ਹੁੰਦਾ ਹੈ ..ਤੇ ਫਿਰ ਉਸ ਨੇ ਜਿੰਦਰ ਨੂੰ ਉਸ ਕੁੜੀ ਬਾਰੇ ਤੇ ਉਸ ਕੁੜੀ ਨੂੰ ਜਿੰਦਰ ਬਾਰੇ ਵੀ ਦੱਸ ਦਿੱਤਾ –
ਪਹਿਲੀ ਮੁਲਾਕਾਤ ~
ਪਲਕਾਂ ਝੁਕਾ ਰੱਖਿਆ ਉਸ
ਤਵੀਤੀ ਉੱਤੇ ਹੱਥ

ਮਿੱਤਰ


ਬੜੇ ਸਾਲਾਂ ਤੋਂ ਆਪਣੇ ਸ਼ਹਿਰ ਲੰਮੇ ਅਰਸੇ ਬਾਅਦ ਚੱਕਰ ਲੱਗਦਾ ਹੈ… ਐਤਕੀਂ ਬਸ ਅੱਡੇ ਉੱਤਰਿਆ… ਰਿਕਸ਼ੇ ਵਾਲੇ ਵੱਲ ਹੋਇਆ… ਉਹਨੇ ਮੈਨੂੰ ਧਿਆਨ ਨਾਲ ਵੇਖਿਆ ਤੇ ਮੈਂ ਉਹਨੂੰ… ਦੋਵਾਂ ਦੀਆਂ ਹੀ ਅੱਖਾਂ ਚਮਕ ਉਠੀਆਂ… ਮੇਰਾ ਸਕੂਲ ਦਾ ਜਮਾਤੀ… ਕਠਿਆਂ ਕ੍ਰਿਕਟ ਗਲੀ ਮੁਹੱਲੇ ਵਾਲਾ ਗੇਂਦ ਬੱਲਾ ਵੀ ਖੇਡਦੇ ਹੁੰਦੇ ਸੀ… ਖਾਸਾ ਚਿਰ ਖੜ੍ਹੇ ਗੱਲਾਂ ਕਰਦੇ ਰਹੇ… ਫੇਰ ਕਹਿੰਦਾ, “ਆਜਾ ਘਰ ਛੱਡਾਂ ਤੈਨੂੰ”… ਘਰ ਵੀ ਮੇਰਾ ਉਹਨੂੰ ਪਤਾ ਈ ਐ ਚੰਗੀ ਤਰ੍ਹਾਂ… ਮੈਂ ਪਿਛੇ ਬਹਿ ਗਿਆ ਤੇ ਉਹ ਚਲਾਉਣ ਲੱਗ ਗਿਆ..ਹੱਸ ਹੱਸ ਗੱਲਾਂ ਮਾਰਦੇ… ਘਰ ਆ ਗਿਆ… ਮੈਂ ਜੇਬ ਨੂੰ ਹਥ ਪਾਇਆ ਤਾਂ ਓਹਦਾ ਇੱਕ ਇਸ਼ਾਰਾ ਐਸਾ ਸੀ ਕਿ ਪਤਾ ਨਹੀਂ ਕਿਓਂ ਮੈਂ ਜੇਬ ਚੋ ਪੈਸੇ ਕਢ ਨਹੀਂ ਸਕਿਆ… ਮੈਂ ਚਾਹ ਦਾ ਸੱਦਾ ਦਿੱਤਾ ਤੇ ਪਤਾ ਨਹੀਂ ਕਿਓਂ ਉਹਨੇ ਹਾਮੀ ਨਹੀਂ ਭਰੀ… ਹਥ ਮਿਲਾਇਆ ਤੇ ਕਹਿੰਦਾ, “ਚੰਗਾ !”…ਇਹੋ ਮੈਂ ਕਿਹਾ , “ਚੰਗਾ”… ਬੜੀ ਸੁਹਣੀ ਮੁਸਕਾਨ ਸੀ ਉਹਦੀ ਜਾਂਦੀ ਵਾਰ ਦੀ…

ਚੜ੍ਹਦਾ ਦਿਨ –
ਮੁਸਕਰਾਇਆ ਚਿਰੀਂ ਮਿਲਿਆ
ਮਿੱਤਰ ਪੁਰਾਣਾ