ਕਿਲਕਾਰੀ


ਨਿੱਘੀ ਸਵੇਰ –
ਪੰਛੀਆਂ ਦੇ ਗੀਤ ਵਿਚ
ਬੱਚੇ ਦੀ ਕਿਲਕਾਰੀ

Advertisements

ਜੱਦੀ ਘਰ


ਭਿੰਦਾ ਸੱਤਰਵਿਆਂ ਚ ਚਾਚੇ ਦੇ ਭੇਜੇ ਘੁੰਮਣ ਫਿਰਨ ਦੀ ਰਾਹਦਾਰੀ ਤੇ ਇੰਗਲੈਡ ਆ ਵੜਿਆ ਤੇ ਫੇਰ ਐਥੇ ਦਾ ਈ ਹੋ ਕੇ ਰਹਿ ਗਿਆ । ਵਿਆਹ ਕਰਾਕੇ ਪੱਕਾ ਹੋਇਆ, ਫੇਰ ਜੁਆਕ ਹੋਏ, ਸਮੇਂ ਦਾ ਪਤਾ ਹੀ ਨਾ ਲੱਗਿਆ । ਬਾਪ ਤਾਂ ਹੈ ਨੀ ਸੀ, ਮਾਂ ਨੂੰ ਕੋਲ ਬੁਲਾ ਲਿਆ । ਘਰਵਾਲੀ ਦਾ ਧੱਕੜ ਵਤੀਰਾ ਤੇ ਦਬਾਅ ਹੇਠ ਮਾਂ ਨੇ ਥੋੜੇ ਸਾਲ ਹੀ ਕੱਢੇ, ਤੇ ਗੁਜ਼ਰ ਗਈ । ਅਸਥ ਲੈਕੇ ਪਿੰਡ ਪੁੱਜਾ ਦੇਖਿਆ, ਪੁਸ਼ਤੈਨੀ ਘਰ, ਖੰਡਰ ਚ ਤਬਦੀਲ ਹੋ ਚੁੱਕਾ ਸੀ………..ਉਹ ਘਰ ਜਿੱਥੇ ਜੰਮਿਆ ਪਲਿਆ……….

ਵਲੈਤੀਆ
ਭਿੱਜੀਆਂ ਅੱਖਾਂ ਨਾਲ ਤੱਕੇ
ਢੱਠਾ ਜੱਦੀ ਘਰ

ਘੁੰਮਦਾ ਗਲੋਬ
ਬਿਨ ਝਪਕਿਆ ਦੇਖੇ
ਵਿਦੇਸ਼ੀ ਪੁੱਤ

ਢਲੀ ਤਰਕਾਲ –
ਵਲੈਤੀਏ ਦੀ ਭੁੱਬ ਨਾਲ ਖਿਸਕੀ
ਜੱਦੀ ਖੰਡਰ ਦੀ ਚੁਗਾਠ

ਕੰਜਕਾਂ


ਹੈਲੋ……….. “ਹੈਪੀ ਬਥਡੇ ਪੁੱਤ”, ਮਾਂ ਦਾ ਫੋਨ ਸੀ ਪੰਜਾਬ ਤੋਂ, “ਗੁਰਦਆਰੇ ਮੱਥਾ ਟੇਕ ਆਇਆ ?……ਹਾਂਜੀ, ਮੈ ਜਵਾਬ ਦਿੱਤਾ ……ਚੰਗਾ ਫੇ ਖਿਆਲ ਰੱਖੀਂ,…… ਸਾਡਾ ਦੋਨਾਂ ਦਾ ਗਲਾ ਭਰ ਆਇਆ । ਮੇਰੇ ਹੰਝੂ ਆਪ ਮੁਹਾਰੇ ਵਗ ਤੁਰੇ । ਮੇਰੀ ਮਾਂ ਤੇ ਮੈਂ ਕਦੇ ਵੀ ਫੋਨ ਤੇ ਬਹੁਤੀ ਗਲ ਨੀ ਕਰ ਸਕਦੇ, ਭਾਵੁਕ ਹੋ ਜਾਂਦੇ ਆਂ । ਉਹ ਮੇਰੇ ਹਰ ਜਨਮ ਦਿਨ ਤੇ ਕੰਜਕਾਂ ਨੂੰ ਰੋਟੀ ਜਰੂਰ ਖਿਲਾਉਂਦੀ ਹੈ । ਜਦੋਂ ਮੈਂ ਉੱਥੇ ਹੁੰਦਾ ਸੀ ਤਾਂ ਸਾਰੇ ਮੁਹੱਲੇ ਦੀਆਂ ਬੱਚੀਆਂ ਕੱਠੀਆਂ ਕਰਕੇ ਪੈਰ ਧੋਣੇ, ਰੋਟੀ ਖਲਾ ਪੈਰੀਂ ਹੱਥ ਲਾਕੇ ਪੈਸੇ ਦੇਣੇ । ਮੇਰੀ ਮਾਂ ਹਾਲੇ ਵੀ ਹਰ ਸਾਲ ਕੰਜਕਾਂ ਨੂੰ ਰੋਟੀ ਜਰੂਰ ਖਿਲਾਉਂਦੀ ਹੈ, ਜਦਕਿ ਮੈਂ ਉੱਥੇ ਨ੍ਹੀਂ ਹੁੰਦਾ………….

ਕੰਜਕਾਂ
ਜਾਣ ਲੱਗੀਆਂ ਪੁੱਛਣ
ਕੀਹਦਾ ਜਨਮ ਦਿਨ